Inaagiw na ang larawan
Naninilaw na ang pahina
Ng mga dokumentong
Tala ng paglabag sa karapatang pantao
Huwag nang paulit-ulit
Huwag nang makulit
Move on na ang sabi
Ng mga payaso at naghahari
Kalimutan na ang nakaraan
Magkaisa para sa kanilang kinabukasan
Itigil na ang poot at galit
Magkaisa para sa mga batang paslit
Escalante, Las Navas, Palimbang
Kakalimutan na lang ba
Ang masaker ng taumbayan
Dulag, dela Paz, Escandor, Aquino
Kakalimutan na lang ba ang mga nagtaguyod ng karapatang pantao
Hermon, Hilao, Enriquez
Kakalimutan na lang ba ang mga biktima ng sapilitang pagkawala
Diokno, Tañada, Salonga, Ocampo
Kakalimutan na lang ba ang mga biktima ng pagkabilanggo
Dahil sa paniniwala at paninindigan
Hindi! Hindi! Hindi!!!
Ang kadakilaan ay mananatiling buhay
Ang sakripisyo ay nakaukit sa alaala ng mga karaniwang tao.
Hindi mauupos ang apoy ng kadakilaan
Hindi magagapi ng dilim ang liwanag ng katotohanan
Hangga’t may nagmamahal sa ating bayan
Tuloy ang laban para sa katarungan at kapayapaan.
TFDP
25 Pebrero 2024
